Ümumi məlumat

Azintrend Qiymətləndirmə və Tədqiqat Mərkəzi Azərbaycan Respublikasının qanunvericiliyi ilə müəyyən edilmiş qaydada daşınar və daşınmaz əmlaklara dair qiymətləndirmə və tədqiqat xidmətlərini təqdim edir.

Mərkəzin başlıca məqsədi milli və beynəlxalq qiymətləndirmə standartlarının tətbiq edilməsi ilə ölkəmizdə əmlak sahəsində peşəkar qiymətləndirmə və tədqiqat xidmətlərini təşkil edərək müştərilərin uğurunu dəstəkləməkdir.

Müəssisə və təşkilatların idarə edilməsində, alqı-satqı proseslərinin və hərracların həyata keçirilməsində, məhkəmə mübahisələrinin həll olunmasında, investisiya layihələrinin icrasında, əmlak sənayesində, ipoteka, kredit, lizinq və sığorta biznesində əsas yer tutan məsələlərdən biri də qiymətləndirmə və tədqiqat işlərinin peşəkar şəkildə həyata keçirilməsidir.

Bununla əlaqədar olaraq Mərkəz kadr seçiminə xüsusi diqqət göstərərək müvafiq ali təhsilə, ixtisas şəhadətnaməsinə, sertifikata və iş təcrübəsinə malik olan mütəxəssislərdən ibarət peşəkar kadr heyəti formalaşdırmışdır.

Mərkəz ümumilikdə 30-dan çox xarici ölkədə əmlakın qiymətləndirilməsi və daşınmaz əmlak bazarı sahəsində fəaliyyət göstərən təşkilat və mütəxəssislərlə əməkdaşlıq münasibətlərinə malikdir. Odur ki, Mərkəz tərəfindən beynəlxalq təşkilat və ya mütəxəssislərin cəlb edilməsi ilə xarici ölkələrdə mövcud olan istənilən növ daşınar və daşınmaz əmlakın müasir qiymətləndirmə metodları əsasında qiymətləndirilməsi, bazar dəyərinin müəyyən edilməsi, daşınmaz əmlak bazarının araşdırılması, investisiya imkanlarının müəyyən edilməsi, müxtəlif növ tədqiqat və konsaltinq xidmətlərinin göstərilməsi mümkündür.

Azintrend Qiymətləndirmə və Tədqiqat Mərkəzi olaraq təqdim etdiyimiz xidmətlər üzrə peşəkarlığımızı bir daha vurğulayaraq əmlakın qiymətləndirilməsi və tədqiqatı sahəsində əməkdaşlıq etməyi böyük məmnunluqla Sizə təklif edirik.